GENSAN- Gipahinumdoman sa Department of Trade and Industry o DTI -Gensan ang mga konsumidor nga sigurohon ang kalidad ug seguridad sa Christmas lights nga ilang paliton karong panahon sa kapaskuhan, ilabina ang mga produkto nga gibaligya online.
Matud ni Elyka Agan, Senior Trade-Industry Development Specialist sa Consumer Protection Division sa DTI GenSan, kinahanglan nga adunay Philippine Standard o PS mark o Import Commodity Clearance o ICC sticker ang mga Christmas lights nga gibaligya sa Pilipinas.
Gipasabot ni Agan nga magpareho ang ‘requirement’ sa mga Christmas lights nga gipalit sa pisikal nga tindahan ug sa mga orderon pinaagi sa ‘online shops’ o ‘e-commerce platforms’.
Matud pa niya, nakigtambayayong ang DTI sa mga ‘online platform’ aron masiguro nga matangtang sa ilang mga ‘site’ ang mga Christmas lights nga walay PS mark o ICC sticker.
Gidasig sa DTI ang mga konsumidor nga magmatngon ug susihon una ang mga marka sa produkto aron malikayan ang pagpalit og Christmas lights nga dili sigurado ang kalidad ug mahimong makahatag og peligro.
