Nakit-an ang usa ka asteroid nga adunay kapin sa usa ka porsyento nga tsansa nga moigo sa yuta sa sunod nga walo ka tuig.
Sumala sa NASA, ang asteroid susama sa gidak-on sa usa ka football field ug posibleng hinugdan sa kaylap nga kadaot sa siyudad nga maigo niini.
Bisan wala pa mahadlok ang mga eksperto, padayon nila kining gibantayan.
Ang 2024 YR4 mao ang asteroid nga unang naobserbahan niadtong Disyembre 27, 2024 sa El Sauce Observatory sa Chile.
Base sa kahayag niini, kini adunay gibana-bana nga gidak-on nga 130 ngadto sa 300 feet o 40 ngadto sa 90 metros ang gilapadon.
Pag sulod sa bag-ong Tuig, kini nga taho nakaabot kang Kelly Fast, acting planetary defense officer sa US space agency nga NASA, ug giila nga usa ka butang nga gikabalak-an.
Sa pinakabag-o nga kalkulasyon sa Jet Propulsion Laboratory sa NASA, adunay 1.6 porsyento nga tsansa nga maigo ang asteroid sa Yuta sa Disyembre 22, 2032.
Kung moigo kini, posible nga ang silangang Pacific Ocean, amihanang South America, Atlantic Ocean, Africa, Arabian Sea, ug South Asia mahimong lugar nga maapektuhan niini.
