-- ADVERTISEMENT --

Gilauman nga makatabang sa pagpaubos sa presyo sa pagkaon ug enerhiya sa Pilipinas ang pakigpulong ni Pangulong Ferdinand Marcos Jr. kang US President Donald Trump, aron makakuha ang nasud og dugang suplay sa mga importanteng produkto sa mas barato nga presyo.

Matod ni Marcos, giablihan sa Estados Unidos ang ilang merkado alang sa mga produktong pang-agrikultura ug enerhiya nga mahimong mapalit sa Pilipinas, lakip na ang soybeans, trigo ug bugas, ingon man ang mas barato nga suplay sa enerhiya.

Gipasabot sa Presidente nga dako ang epekto sa pagsaka sa presyo sa lana sa kantidad sa mga pagkaon, busa importante ang pagpangita og mas barato nga tinubdan sa enerhiya ug mga batakang panginahanglanon.

Dugang pa niya, usa sa mga nag-unang hisgotanan nila ni Trump ang pag-abli sa merkado sa Amerika alang sa Pilipinas, ilabi na sa sektor sa pagkaon ug enerhiya.

Samtang, padayon usab ang gobyerno sa pagpangita og dugang mga kaabag gikan sa nagkalainlaing nasud aron masiguro ang igo ug mas barato nga suplay sa mga importanteng produkto, diin gisugdan na usab sa mga kalihim sa Gabinete ang paghisgot sa mga detalye sa maong kasabutan.

-- ADVERTISEMENT --