-- ADVERTISEMENT --

GENSAN- Miabot na sa 105 ang natala nga insidente sa sunog sa General Santos City hangtod Oktubre ning tuiga, mas taas kon itandi sa natalang kaso sa samang panahon sa miaging tuig.

Matod ni SFO1 Lester John Muñez, Arson Investigator sa Bureau of Fire Protection o BFP Gensan, usa sa mga hinungdan sa pagtaas sa insidente mao ang init nga panahon ug sobra nga paggamit sa mga electrical appliances, lakip na ang mga sunog sa kasagbutan.

Giawhag ni Muñez ang publiko nga likayan ang pagsunog sa basura kay gidili kini sa siyudad ug mahimong hinungdan sa pagkuyanap sa kalayo. Gisugyot usab niya ang hustong pagbulag sa mga basura ug pagpakig-alayon sa barangay alang sa pagkolekta niini.

Gipahinumdoman usab ang mga residente nga motawag dayon sa 911 kon adunay makita nga emerhensiya, ug ipadayon ang paglimpyo sa sulod ug gawas sa ilang mga panimalay aron malikayan ang dali nga pagkuyanap sa kalayo.

Dugang pa sa opisyal, kinahanglan kanunay nga susihon ang kahimtang sa mga electrical appliances ug wiring sa balay, ilisan ang nadaot nga mga kable ug likayan ang sobra nga paggamit sa extension wires, ilabi na ang pagkonektar sa usa ka extension wire ngadto sa laing extension wire, tungod kay mahimo kining hinungdan sa sunog.

-- ADVERTISEMENT --