Tulo na ka tawo ang namatay samtang 36 pa ang padayon nga gipangita human miulbo ang sunog sa usa ka pabrika sa kendi sa Western Java, Indonesia ning adlaw nga Domingo, Nobyembre 22.
Nahitabo ang sunog sa usa ka pabrika sa distrito sa Serang, Banten Province, nga nahimutang mga 50 kilometros sa kasadpan sa kapital nga siyudad sa Indonesia nga Jakarta.
Matod sa National Search and Rescue Agency sa Indonesia, 15 na ka tawo ang naluwas gikan sa sunog, diin upat kanila ang gidala dayon sa ospital.
Padayon usab ang paningkamot sa mga rescuers sa pagpangita sa mga tawo nga wala pa makit-i sulod sa pabrika.
Matod ni Banten Governor Andra Soni, gibanabanang 60 ka tawo ang anaa sulod sa pabrika sa dihang midilaab ang sunog niadtong Sabado sa gabii.
Padayon pang giimbestigahan sa mga otoridad ang hinungdan sa sunog, diin nahibaw-an nga gipanag-iya ang maong pabrika sa usa sa pinakadakong kompanya sa pagkaon ug ilimnon sa Indonesia.











