Nasikop sa mga otoridad sa Mexico ang giila nilang drug lord nga si Fausto Isidro “Chapo Isidro” Meza Flores, nga apil sa listahan sa Top 10 Most Wanted sa Federal Bureau of Investigation (FBI).
Gipangunahan sa Mexican special forces ang operasyon batok kang Meza Flores sa Guasave, Sinaloa, diin nadakpan usab ang usa niini ka kauban.
Giatubang ni Meza Flores ang kaso nga may kalabotan sa organisadong krimen sa Mexico ug giingong nalambigit sa pagpalusot ug pag-apod-apod sa fentanyl, cocaine, heroin ug uban pang ilegal nga droga. Siya ang lider sa Meza Flores Organization, nga nailhan usab nga Guasave Cartel.
Aktibo na ang maong grupo sa pagpang-apod-apod sa ilegal nga droga sukad pa niadtong 1990, samtang dugay usab nga nagtago si Meza Flores gikan sa mga otoridad. Natultolan ang iyang nahimutangan pinaagi sa Estados Unidos.
Nagbinayloay pa og pinusilay ang iyang grupo ug ang mga otoridad sa wala pa siya hingpit nga madakpan. Giapil si Meza Flores sa most wanted list sa FBI niadtong 2025 tungod sa mga kasong kidnapping, extortion ug torture.
Siya usab ang giingong nalambigit sa pagmaligya sa kapin 20 milyong fentanyl pills nga nasakmit sa mga otoridad niadtong 2024. Dugang pa, giatubang na niya ang mga kaso sa drug trafficking sa Estados Unidos niadtong 2012 ug 2019.
Gituohang nakigtambayayong usab siya sa mga grupo nga naghimo ug nag-apod-apod og cocaine, heroin, methamphetamine ug marijuana gikan 2005 hangtod 2019.
Sa wala pa niya tukora ang kaugalingong organisasyon, miyembro siya sa Beltrán Leyva Organization apan mitiwalag siya human sa panagbangi sulod sa maong grupo. Gidala dayon sa Mexico City si Meza Flores ug ang iyang kauban human sa ilang pagkadakop.











