Patay ang usa ka drayber sa motorsiklo samtang samdan ang iyang back rider ug usa ka pedestrian human maapil sa aksidente sa trapiko sa Sitio Nacolil, Barangay Lago, Glan, Sarangani Province, kagabii, Nobyembre 21.
Giila ang namatay nga si Felix Santillan Gonzalez, minyo ug residente sa Purok Gemelina, Barangay Ilaya, Glan. Samtang ang iyang back rider nga si Lorelie Tribunalo Pelarion, 46 anyos, ug ang pedestrian nga si Alberto Balila Bejarasco, usa ka senior citizen.
Base sa imbestigasyon sa Glan Municipal Police Station, nagbiyahe paingon sa Alabel si Gonzalez kauban ang iyang back rider dihang kalit nga mitabok sa ilang agianan ang pedestrian nga si Bejarasco.
Tungod niini, nawad-an og kontrol ang motorsiklo ug nahitabo ang aksidente. Gidala dayon ang tulo sa Sarangani Provincial Hospital sa Glan alang sa medikal nga pag-atiman.
Sa report sa kapulisan, nakaangkon og daghang samad ang drayber nga maoy hinungdan sa iyang kamatayon, samtang minor injuries ang naangkon sa duha pa ka biktima. Gikumpirma usab nga gamay lamang ang kadaot sa motorsiklo.
Padayon pang nagpa-confine sa maong ospital ang duha ka samdan alang sa ilang pagtambal.











