Gikumpirma ni US President Donald Trump nga wala na matod pa’y plano ang Estados Unidos nga moatake pa sa Iran.
Matod ni Trump, adunay maayong padulngan ang negosasyon aron hingpit nang mahunong ang gubat sa Middle East.
Dugang pa niini, gipabilin una sa status quo ang desisyon bahin sa posibleng pag-atake.
Gipagawas ni Trump ang maong pahayag human sa iyang pakigtagbo sa Prime Minister sa Qatar.
Ang Qatar usa ka kaalyado sa Estados Unidos sa Gulf region ug silingang nasud sa Iran.
Dako usab ang papel sa Qatar isip tigpataliwala sa paningkamot nga mahunong na ang gubat.
Giklaro usab ni Trump nga kanunay silang andam o gitawag niyang “Lock and Loaded” kung adunay kausaban sa sitwasyon.
Dili pa sa tukmang panahon nga ideklara sa Estados Unidos ang pagtapos sa gubat batok sa Iran tungod kay adunay pipila ka nasud sa Middle East nga posibleng makasinati pa sa agresibong lihok sa Iran.
Kahinumduman nga mibisita sa White House si Qatari Prime Minister Sheikh Mohammed bin Abdulrahman Al Thani diin nahisgutan nila ni Trump ang maayong kahimtang sa ilang negosasyon aron hingpit nang mahunong ang gubat sa Middle East.
