Padayon ang pagpahinumdom sa Commission on Elections (COMELEC) Region 12 sa mga kwalipikadong botante nga dili palampason ang higayon nga makarehistro alang sa 2028 National and Local Elections.
Sumala ni Atty. Jeljan Panal, Regional Election Attorney sa COMELEC 12, importante nga maasikaso sa mga botante ang ilang rehistro samtang nagpadayon ang registration period gikan Nobyembre 10, 2026 hangtod Hulyo 30, 2027.
Gidawat ang mga aplikasyon alang sa bag-ong rehistro, transfer, reactivation ug correction of entry. Bukas ang mga opisina sa COMELEC gikan Martes hangtod Biyernes, alas-8 sa buntag hangtod alas-6 sa gabii.
Gipahinumdoman usab ang mga wala makabotar sa duha ka sunod-sunod nga eleksyon nga kinahanglan magpa-reactivate aron maibalik ang ilang aktibong voter status.
