Duha ka Pilipino nga nahimong ‘naturalized American citizens’ ang naapil sa 40 ka indibidwal nga posibleng bawian og US citizenship tungod sa gipakusog nga kampanya sa administrasyon ni US President Donald Trump batok sa immigration fraud ug uban pang kalapasan.
Gikilala sa US Department of Justice ang duha nga sila si Arnel Dacumos Tabafunda, 47-anyos, ug Ramon Navarro, 68-anyos, nga nag-atubang sa managlahing denaturalization proceedings sa mga pederal nga korte sa California.
Sumala sa Justice Department, posibleng bawion ang citizenship ni Tabafunda tungod sa giingong pagtago niini sa mga kaso sa seksuwal nga pag-abuso sa usa ka menor de edad sa wala pa ug human siya nahimong US citizen niadtong 2005.
Samtang, nag-atubang usab og kaso si Navarro tungod sa giingong peke nga kaminyoon aron makakuha og immigration benefits ug sa ulahi, US citizenship.
Gikataho sa DOJ nga nakapasa kini og mga reklamo batok sa 40 ka indibidwal gikan Agosto 21 hangtod Oktubre 2, 2026, nga maoy pinakadaghang kaso nga gisang-at sulod sa usa ka yugto sa panahon ubos sa administrasyon ni Trump.
Ubos sa US Immigration and Nationality Act, mahimong bawion ang naturalized citizenship kon napamatud-ang ilegal ang pagkuha niini o nakab-ot pinaagi sa pagtago sa importanteng impormasyon o tinuyo nga paghatag og bakak nga pahayag.
