Abri ang gobyerno sa Pilipinas sa pakigtambayayong sa mga miyembro sa Association of Southeast Asian Nations (ASEAN) aron matubag ang nagkagrabeng epekto sa El Niño, ilabi na sa mga lugar nga direktang nag-atubang sa Pacific Ocean nga maoy labing apektado.
Sumala kang Department of Social Welfare and Development (DSWD) Secretary Rex Gatchalian, gipalig-on sa mga miyembrong nasud ang ilang panaghiusa aron mapanalipdan ang mga kabos ug bulnerableng sektor batok sa epekto sa maong weather phenomenon.
Matod pa niya, posible nga ang epektibong pamaagi sa usa ka nasud magamit usab sa ubang nasud, busa importante nga magtinabangay ang mga miyembro aron mapaghiusa ang nagkalain-laing best practices.
Sa pagkakaron, adunay tagsa-tagsa ka programa ang matag miyembrong nasud aron matabangan ang mga pamilyang labing apektado sa mga krisis, subay sa ilang mga panginahanglan ug epekto nga ilang nasinati.
Dugang pa sa kalihim nga importante ang pagbayloay og kahibalo ug kasinatian tali sa mga nasud bahin sa social protection, ilabi na kay walay usa ka pamaagi nga angay gamiton sa pagtubag sa grabeng epekto sa kasamtangang very strong El Niño.
Nagpahayag usab si Gatchalian og pagsalig nga makapaambit ang mga miyembrong nasud sa ASEAN og epektibong mga lakang aron mas mapalig-on ang proteksyon sa mga kabos ug bulnerableng sektor.
