Gimandoan sa lokal nga panggamhanan sa Delhi, India, ang mga eskwelahan nga ipahigayon na lamang sa online ang ilang mga klase tungod sa nagkagrabeng kalidad sa hangin sa maong lugar.
Gidasig usab ang mga empleyado nga magtrabaho gikan sa ilang mga panimalay, samtang gi-postpone una ang pipila ka mga kalihokan aron malikayan ang dugang nga pag-grabe sa polusyon sa hangin.
Dugang sa gikabalak-an sa mga otoridad ang umaabot nga pagsaulog sa Diwali, usa ka pista sa mga Hindu nga nailhan isip Festival of Lights, nga gikatakdang ipahigayon karong Domingo.
Kasagarang mogamit og mga pabuto ang mga tawo atol sa maong selebrasyon, nga gilauman nga mas makapasamot pa sa polusyon sa hangin.
Dugay nang problema sa amihanang bahin sa India ang polusyon sa hangin, ilabi na sa pagsugod sa bugnaw nga panahon.
Niining panahona, mas magtapok sa atmospera ang nagkalain-laing matang sa polusyon, lakip na ang aso gikan sa mga sakyanan, abog gikan sa mga ‘construction site’ ug aso nga gikan sa pagsunog sa basura.
Niadtong miaging semana, natala sa Delhi ang Air Quality Index o AQI nga miabot sa 382, base sa datos sa Central Pollution Control Board.
Nalakip kini sa kategoryang ‘Very Poor’ nga nagpasabot sa taas nga lebel sa polusyon sa hangin.
Daghang residente ang nagpahayag na usab sa ilang kabalaka tungod kay gibati na nila ang dili maayong epekto sa hugaw nga hangin sa ilang panglawas.
Tungod niini, nagmando ang Commission for Air Quality Management sa mas hugot nga mga lakang aron makontrol ang polusyon ug malikayan ang dugang pang pagkunhod sa kalidad sa hangin sa Delhi.
