Gikumpirma ni US President Donald Trump nga nagpahigayon ang militar sa Estados Unidos og gitawag niining minor strikes batok sa air defense system sa Iran sa Qeshm Island, nga nahimutang sa Strait of Hormuz.
Samtang gikumpirma usab sa Iranian state media ang pag-atake sa Suza area ug giangkon sa ilang militar nga napukan nila ang usa ka American MQ-9 drone sa maong isla.
Gipahayag sa US Central Command kon CENTCOM nga nagpabiling kontrolado ang sitwasyon, apan wala na usab minghatag og dugang detalye kalabot sa insidente, ug nagtanyag pa og ganti nga mokabat sa 20 milyones dolyares alang sa makahatag og impormasyon bahin sa nuclear program ug mga siyentista sa Iran.
Bisan pa sa nagpadayong tensiyon militar, giinsistir ni Trump nga adunay dakong kalamboan sa negosasyon tali sa Washington ug Tehran, samtang gisalikway sa gobyerno sa Qatar ang mga alegasyon nga napakyas na ang panaghisgot sa duha ka nasud ug nagpadayon ang ilang paningkamot sa pagtabang aron malikayan ang mas dakong kagubot sa rehiyon.
Sa laing bahin, nagpabiling nakaandam ang liboan ka tropang Amerikano ug mga barkong pandigma sa Middle East alang sa posibleng mas dako nga operasyong militar kon mandoan ni Trump.
