Gibarugan sa Philippine National Police kon PNP nga kabahin lamang sa ilang katungdanan ang pagpangita ug pagdakop kang Senador Ronald Dela Rosa.
Gibutyag ni PNP Spokesperson PCol. Allen Rae Co nga bisan pa man nga giila nila ang mga nahimo ni Dela Rosa isip Chief PNP kaniadto, propesyonal nga gituman karon sa mga kapulisan ang ilang tagsa-tagsa ka katungdanan.
Matod sa opisyal, trabaho lamang kini ug walay personalan, nga mao usab ang prinsipyo nga kanunayng gipadapat sa kapulisan sa ilang mga operasyon.
Kauban niini, mas maayo usab kon mogawas na lamang ang senador ug atubangon ang kaso batok kaniya.
Sa laing bahin, gibarugan usab sa tigpamaba sa PNP nga gitahod sa kapulisan ang mga pagbati sa asawa ni Senador Dela Rosa nga si Gng. Nancy, kalabot sa planong pagdakop sa mga otoridad sa iyang bana.
Sa wala pa kini, nagpagawas og pahayag si Gng. Dela Rosa sa social media ug miingon nga daw nawad-an og bili ang mga nahimo sa iyang bana sulod sa kapulisan, tungod kay mao pa matod kini ang iyang madawat nga balos.
