Posibleng mosaka ang presyo sa mga produktong agrikultural tungod sa paghuyang sa balor sa piso batok sa dolyar, sumala sa Department of Agriculture (DA).
Gipasabot ni DA spokesperson Arnel de Mesa nga mas daghang piso ang gikinahanglan aron makapalit sa mga imported nga produkto sama sa bugas ug abono. Miabot sa record low nga ₱64.18 ang baylo sa piso kada dolyar sa intra-day trading niadtong Miyerkules.
Gilauman usab sa DA nga posibleng mosaka pa ang presyo sa bugas sa Nobyembre ug Disyembre tungod sa posibleng epekto sa El Niño. Sumala sa ahensya, miabot na sa 4.36 million metric tons ang gidaghanon sa imported nga bugas nga niabot sa nasud hangtod Oktubre 22.
Bisan pa niini, gipasaligan sa DA nga igo ang suplay ug imbentaryo sa mga nag-unang pagkaon aron matubag ang panginahanglan sa nasud hangtod sa kataposan sa tuig 2026, gikan sa lokal nga produksyon ug mga produktong giangkat gikan sa ubang nasud.
