COTABATO- Nasikop ang duha ka high-value individuals (HVIs) ug nasakmit sa kapulisan ang gibanabanang 100 ka gramos nga gidudahang shabu nga nagkantidad og ₱680,000 atol sa pagpatuman sa search warrant sa Barangay Raradangan, Alamada, Cotabato, alas-5:09 sa buntag, Oktubre 29, 2026.
Gipangunahan sa Alamada Municipal Police Station ang operasyon, uban ang Cotabato Police Provincial Office–Provincial Drug Enforcement Unit, Regional Intelligence Division 12 Special Tactical Team, Provincial Intelligence Unit sa CPPO, Regional Intelligence Unit 12, 2nd Company sa Provincial Mobile Force Battalion, ug 1203rd Maneuver Company sa Regional Mobile Force Battalion 12.
Gawas sa 19 ka heat-sealed plastic sachet nga adunay puti nga kristal nga substansiya nga gidudahang shabu, narekober usab sa mga otoridad ang usa ka Remington .45-caliber pistol, usa ka steel magazine alang sa .45-caliber pistol, ug unom ka bala niini.
Gihimo sa lugar ang pag-imbentaryo ug pagdokumento sa mga nasakmit nga ebidensiya, atubangan sa mga gidakop ug mga saksi, lakip ang representante sa media ug ang barangay chairperson. Gipahibalo usab ang mga gidakop sa ilang mga katungod sa pinulongan o diyalekto nga ilang nasabtan.
Gidala ang mga gidakop sa Alamada Municipal Police Station alang sa hustong disposisyon. Ipadala usab sa Cotabato Provincial Forensic Unit sa Kidapawan City ang gidudahang ilegal nga droga ug uban pang ebidensiya alang sa laboratory examination, samtang giandam na ang tukmang mga kaso nga ipasaka sa prosecution office.
Gipasiugda ni PRO 12 Regional Director PBGEN Alan B. Manibog ang kamahinungdanon sa padayon ug intelligence-driven nga mga operasyon batok sa ilegal nga droga ug hugot nga pagpatuman sa balaod.
