Gibarugan ni kanhi Department of Public Works and Highways (DPWH) Undersecretary Roberto Bernardo nga wala siya direktang nakig-istorya kang kanhi House Speaker Martin Romualdez kalabot sa isyu sa kickback sa mga proyekto sa imprastraktura sa gobyerno.
Gipahayag kini ni Bernardo atol sa iyang pagtestigo kalabot sa petisyon alang sa piyansa ni Romualdez sa Sandiganbayan Third Division.
Matod ni Bernardo, wala maapil si Romualdez sa mga giingong proponent sa mga proyekto sa DPWH nga nagplano o misulay og pakigkita kaniya aron mangayo og kickback o SOP (standard operating procedures).
Wala usab matod siyay direktang transaksiyon o pakigsabot kang Romualdez kalabot sa paghatod og kuwarta o kickback.
Sa pagkatinuod, matod pa ni Bernardo, wala niya hisgoti ang ngalan ni Romualdez sa iyang mga judicial affidavit nga iyang gisumite sa mga piskal sa gobyerno.
Kahinumduman nga kaniadto, mitestigo si Bernardo sa pagdungog sa Senado diin iyang ginganlan ang pipila ka taas nga opisyal sa nasud nga giingong nakabenepisyo sa kickback scheme sa mga kontrata sa gobyerno alang sa mga proyekto sa imprastraktura, diin kadaghanan niini may kalabotan sa flood control.
Lakip sa iyang mga ginganlan sa maong affidavit mao sila si kanhi Senador Bong Revilla, Senador Jinggoy Estrada, kanhi DPWH Secretary Manuel Bonoan, kanhi Undersecretary Cathy Cabral ug uban pa.
Nag-atubang si Romualdez sa kasong plunder tungod sa mga alegasyon nga nakadawat siya og binilyong pisong kickback ug mga suborno gikan sa mga kontrata sa gobyerno alang sa pagtukod sa mga proyekto sa imprastraktura.
