Gihugtan sa Philippine Coast Guard (PCG) ang seguridad sa mga pantalan sa nasud isip pagpangandam sa gipaabot nga pagdagsa sa mga biyahero karong Undas 2026.
Sumala sa tigpamaba sa PCG nga si Commodore Noemie Cayabyab, bisan wala pa’y daghang pasahero sa mga pantalan, mga 17,000 ka personahe sa ahensya ang gipadala aron masiguro ang kaluwasan sa mga biyahero.
Ang PCG anaa sa high alert status sugod karong Oktubre 29 hangtod Nobyembre 3, subay sa gipaabot nga pagtaas sa mga pasahero nga mobiyahe paingon sa mga probinsya.
Gilauman nga ugma, Oktubre 30, magsugod na ang pagdaghan sa mga biyahero sa mga pantalan sa nasud.
Gibutang usab ang mga passenger assistance desk diin makaduol ang mga biyahero nga nanginahanglan og impormasyon ug inisyal nga medikal nga tabang.
Sa samang higayon, gipahugtan usab sa PCG ang mga inspeksyon sa mga barko sa dili pa mobiya aron masiguro nga kini nagsunod sa gitakda nga mga sumbanan sa kaluwasan.
Lakip sa mga butang nga gisusi mao ang hustong pagpatong sa mga kargamento aron dili makababag sa mga agianan ug mga emergency exit, ingon man ang pagpangandam sa mga kagamitan sa pagpalong sa sunog ug mga plano sa barko kung adunay sunog o uban pang emerhensya.
Estrikto usab nga ipatuman sa PCG ang pagdili sa pagsakay sa mga pasahero nga molapas sa gitugot nga kapasidad sa matag barko.
Gitambagan usab ang mga biyahero nga maggahin ug igong oras sa pag-adto sa pantalan aron malikayan ang pagdali ug kahasol sa ilang biyahe karong Undas.
Sumala ni Cayabyab, importante nga masiguro nga ang mga barko dili molapas sa gitakdang kapasidad sa pasahero aron malikayan ang mga aksidente ug uban pang insidente sa dagat, labi na sa mga panahon nga daghan ang mga biyahero.
