GENSAN- Gitan-aw sa Lokal nga Kagamhanan sa Gensan ang posibilidad sa pagbutang og ‘earthquake detection devices’ sa pipila ka lugar sa siyudad aron mapalambo ang pagmonitor sa mga linog ug paghatag og sayo nga pasidaan sa mga residente.
Nakigpulong sa buhatan ni Mayor Lorelie Geronimo Pacquiao ang SKEPTER Technologies Inc., usa ka kompanya gikan sa Korea, aron hisgutan ang plano sa pagbutang sa maong mga himan.
Lakip sa ilang gihisgutan ang posibilidad nga isumpay ang teknolohiya sa kompanya ngadto sa kasamtangang mga ‘earthquake detection device’ sa siyudad aron mas mapalambo ang pagmonitor sa kalihokan sa linog ug ang paghatag og sayong pasidaan.
Subay sa inisyatiba ni Mayor Pacquiao, padayon nga gisusi sa lokal nga kagamhanan ang mga bag-ong teknolohiya nga makatabang sa pagpalig-on sa kaandam sa siyudad panahon sa mga kalamidad ug pagpanalipod sa kinabuhi sa mga residente.
Kabahin kini sa padayon nga mga lakang sa siyudad aron mapalambo ang ‘disaster preparedness’ ug ‘risk reduction systems’, ilabi na sa paghatag og tukma sa panahon nga impormasyon aron ang mga residente makapangandam ug makatubag sa posibleng peligro nga dala sa linog.
