Kumpiyansa ang Department of Agriculture kon DA nga mabati na sa mga konsumidor ang pag-ubos sa presyo sa karne sa lokal nga merkado sa pagsulod sa Nobyembre o Disyembre.
Kini human hingpit nang giaprobahan ni Presidente Ferdinand Marcos Jr. ang pagdugang sa gidaghanon sa mais nga angkaton sa nasud.
Kamatikdan nga ubos sa bag-ong mando, gipataas gikan sa 220,000 metric tons ngadto sa 500,000 metric tons ang Minimum Access Volume alang sa importasyon sa mais.
Matod ni Agriculture Spokesperson Asec. Arnel De Mesa, dakong tabang ang pagdugang sa gidaghanon sa mais nga angkaton aron masulbad ang problema sa livestock industry, ilabina ang taas nga presyo sa feeds o pagkaon sa mga hayop.
Segurado usab nga moubos ang gasto sa pagpakaon sa mga hayop ug malikayan ang pagsaka sa presyo sa karne kon modaghan ang stock o suplay sa mais nga maoy nag-unang kinahanglanon sa paghimo og animal feeds.
Matod pa niya, kabahin ang maong lakang sa pasalig sa gobyerno sa Pilipinas nga panalipdan ang mga magbababoy ug mapalambo ang livestock industry sa tibuok nasud.
