Nagpadayon ang pagdumala sa City Social Welfare and Development Office o CSWDO-GenSan sa mga kaso sa mga batang makita nga nagapalimos sa nagkalain-laing lugar sa dakbayan.
Sumala ni Sarah Kate Batilong, Social Officer III sa CSWDO-GenSan, daghan silang madawat nga report bahin sa mga batang nagapangayo og limos, ilabina kon adunay dagkong kalihukan sama sa Tuna Festival.
Dili usab nila maadtuan dayon ang tanang lugar tungod sa kadaghan sa mga batang makita nga nagapalimos.
Matud ni Batilong, kung dili malikayan ang paghatag og tabang, mas maayo nga pagkaon na lamang ang ihatag imbes nga kwarta.
Aduna usab silay programa diin ilang gina-rescue ang mga bata, samtang ang ilang mga ginikanan ginaapil sa seminar ug intervention. Ang mga bata usab ginaalalayan sa academic intervention aron matabangan silang makapadayon sa ilang pag-eskwela.
