Gisaulog sa aktor nga si Marvin Agustin ang ika-30 nga anibersaryo sa ilang panaghigalaay ug pagka-love team ni Jolina Magdangal nga nailhan isip MarJo.
Sa iyang Instagram account, gipaambit ni Marvin ang mga hulagway nilang duha sa nagkalain-laing katuigan ug gipahayag ang kalipay nga human sa daghang tuig, nagpadayon gihapon sila sa ilang panaghigalaay ug sa mga butang nga ilang gihigugma sa showbiz.
Matod ni Marvin, daghan na ang nausab sa ilang kinabuhi ug nakaagi sila sa nagkalain-laing hugna, apan nagpabilin ang ilang panaghigalaay ug gugma nga natukod sulod sa 30 ka tuig.
Nagpasalamat usab siya kang Jolina sa ilang 30 ka tuig nga panag-uban, lakip na sa mga fans nga nahimong kabahin sa ilang istorya.
Mitubag usab si Jolina sa post ni Marvin ug miingon nga natandog siya sa iyang mensahe.
Nahimong usa sa pinakasikat nga love teams sa Pilipinas niadtong dekada 1990 ang MarJo, nga nagbida sa mga pelikulang Hey Babe! ug Labs Kita… Okey Ka Lang?
