Mokunhod ang presyo sa gasolina ug kerosene samtang mosaka ang presyo sa diesel sa ikatulong semana sa Oktubre, base sa gi-anunsyo nga pag-adjust sa presyo sa mga produktong petrolyo sa Department of Energy o DOE.
Gilauman nga mokunhod og P4.30 kada litro ang gasolina ug P1.00 kada litro ang kerosene, samtang mosaka og P2.60 kada litro ang diesel.
Sumala sa DOE, ang pagsaka sa presyo sa diesel nalambigit sa pagmahal sa gasto sa ‘freight’ ug ‘logistics’ o pagbiyahe ug paghatod sa mga produktong petrolyo, dugang sa taas nga panginahanglan ug hugot nga suplay sa diesel sa Singapore trading market.
Samtang, ang pagkunhod sa presyo sa gasolina gilangkit sa pagdaghan sa suplay niini sa Asya ug sa pagbalik sa normal nga operasyon sa mga planta sa pagproseso sa lana human sa regular nga maintenance.
Ipatuman ang maong mga kausaban sugod alas 6:00 sa buntag sa adlawng Martes, Oktubre 20, ug magpabilin hangtod sa sunod nga pag-adjust sa presyo sa mga produktong petrolyo.
