Gipaklaro ni United States President Donald Trump nga ang iyang desisyon nga suspindihon ang pipila ka silot batok sa Russia gitumong aron magpabiling abri ang negosasyon sa pagtapos sa gubat tali sa Russia ug Ukraine.
Matod ni Trump, dili niya gustong mohimo og lakang nga mahimong hinungdan sa pagbiya sa Moscow sa negosasyon.
Gibabagan ni Trump ang daghang silot batok sa Russia duha ka adlaw sa wala pa kini ipatuman, samtang nagkagrabe ang panagbangi sa iyang administrasyon ug ni Ukrainian President Volodymyr Zelensky.
Gipahayag ni Zelensky nga usa ka dakong sayop sa kasaysayan kon modapig ang Estados Unidos kang Russian President Vladimir Putin.
Samtang, gidayeg sa Russian envoy nga si Kirill Dmitriev ang desisyon ni Trump ug gihulagway kini nga usa ka importante ug makasaysayanong higayon.
Bisan pa niini, giakusaran ni Trump si Zelensky nga dili gustong tapuson ang gubat, apan padayon nga nanawagan ang lider sa Ukraine alang sa pagtapos sa panagsangka sukad gisugdan sa Russia ang dinagkong pagsulong sa ilang nasud niadtong Pebrero 2022.
