SARANGANI- Mokabat sa 17,882 ka mga bata sa Sarangani nga nag-edad og duha hangtod lima ka tuig ang makabenepisyo sa 180 ka adlaw nga supplementary feeding program sa Department of Social Welfare and Development o DSWD, kauban ang provincial government sa Sarangani Province.
Ang maong programa naglangkob sa 589 ka Child Development Centers ug Supervised Neighborhood Play sa tibuok probinsya, diin hatagan ang mga bata og masustansiyado nga pagkaon matag adlaw sulod sa 180 ka adlaw.
Kabahin kini sa prayoridad sa administrasyon ni Sarangani Governor Rogelio “Ruel” D. Pacquiao nga hatagan og pagtagad ang panglawas sa mga bata ug pakunhuran ang malnutrisyon sa probinsya.
Nagsugod ang Provincial Social Welfare and Development Office o PSWDO sa pag-apod-apod sa unang batch sa mga food pack sa mga lungsod sa Alabel ug Malapatan kagahapong adlawa, Oktubre 17, alang sa pito ka adlaw nga menu.
Samtang, nauna nang giapod-apod ang mga suplay sa pagkaon sa mga cluster sa Maitum, Kiamba ug Maasim niadtong Oktubre 13, ug nadawat na sa usab sa Malungon ang ilang bahin niadtong Oktubre 15. Gikatakdang makadawat usab ang Glan sa ilang alokasyon sa Oktubre 20.
Pinaagi sa maong programa, tumong sa PSWDO nga mapaayo ang nutrisyon ug kinatibuk-ang panglawas sa mga bata, lakip ang ilang pag-apil sa mga kalihokan sa klase pinaagi sa adlaw-adlaw nga pagkaon ug padayong edukasyon bahin sa hustong nutrisyon.
