Nagpahinumdom ang Business Permits and Licensing Division o BPLD sa General Santos City ang tanang tag-iya ug operators sa pickleball courts nga ayuhon ug i-update ang ilang mga business permit ug lisensya.
Sumala sa BPLD, bukas ang ilang opisina aron motabang sa mga pickleball court owners ug operators nga gustong mokuha, mo-apply o mag-update sa ilang business permit.
Mahimo silang moadto sa BPLD Temporary Office nga nahimutang sa Dadiangas West Central Elementary School, gikan Lunes hangtod Biyernes, alas-8:00 sa buntag hangtod alas-5:00 sa hapon, alang sa mga pangutana, requirements ug uban pang assistance.
Gihangyo usab ang tanang operators nga siguruhon nga kompleto ug updated ang ilang mga permit ug lisensya aron masiguro nga compliant ang ilang negosyo sa mga ordinansa ug regulasyon sa dakbayan.
Gipasabot sa BPLD nga ang tumong niini mao ang paggiya ug pagtabang sa mga tag-iya ug operators aron mahimong legal, hapsay ug compliant ang ilang mga negosyo sa General Santos City.
