Posibleng mosaka pa sa P21.48 trilyon ang kinatibuk-ang utang sa Pilipinas sa katapusan sa 2027, base sa mga dokumento sa Budget and Expenditures and Sources of Financing. Mas taas kini kumpara sa projected debt level nga P19.76 trilyon alang sa 2026.
Samtang, niabot na sa P19.065 trilyon ang utang sa national government sa katapusan sa Hunyo 2026. Mas taas kini og P518.98 bilyon kumpara sa P18.546 trilyon nga natala niadtong Mayo, ug P17.267 trilyon niadtong Hunyo 2025.
Tungod niini, uban sa hinay nga economic growth nga 2.3 porsyento sa unang tunga sa 2026, misaka sa 66 porsyento sa gross domestic product o GDP ang debt-to-GDP ratio sa nasud.
Kini na ang pinakataas nga lebel sa utang kumpara sa GDP sulod sa 22 ka tuig, sukad niabot kini sa 71.6 porsyento niadtong 2004. Sa gipaabot nga P21.48-trilyon nga utang sa 2027, mokabat sa P14.3 trilyon ang gikan sa domestic borrowing, samtang P7.2 trilyon ang gikan sa external debt.
Nakabase ang maong projection sa assumption nga ang exchange rate sa piso mahimong P62 kada US dollar sa katapusan sa 2027. Samtang, gipaabot nga mokabat sa P3.304 trilyon ang gross borrowings sa national government sa sunod tuig.
Gikan niini, P2.389 trilyon ang gikan sa domestic sources, samtang P914.982 bilyon ang gikan sa foreign sources.
Lakip sa planong domestic borrowing ang P2.329 trilyon nga makuha pinaagi sa fixed-rate Treasury bonds ug P60 bilyon gikan sa Treasury bills.
