Mamenosan og gamay ang fuel surcharge sa mga eroplano sugod karong semanaha, human gi-aprubahan sa Civil Aeronautics Board (CAB) ang pagpaubos niini gikan sa Level 17 ngadto sa Level 16. Pag-book og flight
Sumala sa pahibalo sa CAB, ang bag-ong lebel sa fuel surcharge ipatuman gikan sa Oktubre 16 hangtod 31.
Ubos sa Level 16, ang mga airline mahimong maningil og dugang nga P525 hangtod P1,535 matag pasahero alang sa mga domestic flight.
Samtang, alang sa mga international flight, ang fuel surcharge anaa sa kantidad nga P1,733.76 hangtod P12,891.29 matag pasahero.
Mas ubos kini kon itandi sa miaging Level 17, diin ang dugang bayranan sa mga domestic flight anaa sa P559 hangtod P1,635. Alang sa mga international flight, anaa usab kini sa kantidad nga P1,846.10 hangtod P13,726.58.
Ang fuel surcharge usa ka dugang nga bayranan sa pletehan aron matabonan ang epekto sa mga pagbag-o sa presyo sa sugnod (fuel).
Sumala sa resolusyon sa CAB, ang fuel surcharge mawagtang lamang sa hingpit kung ang aberids nga presyo sa jet fuel sulod sa usa ka bulan moubos sa P21 matag litro.
