Gibanabana nga mosaka og 10 percent ang pag-import sa Pilipinas sa ‘soybean meal’ sa ‘marketing year’ 2026 hangtod 2027 tungod sa nagkadakong panginahanglan niini sa sektor sa manukan, sumala sa United States Department of Agriculture o USDA.
Gilauman nga moabot sa 3.85 million metric tons ang pag-import sa nasud, mas taas og 200,000 ka metric tons kon itandi sa unang banabana nga 3.65 million metric tons.
Matod sa USDA sa ilang report, gilauman nga mosaka ang pag-import sa ‘soybean meal’ sa Pilipinas og 10 percent sa 2026 hangtod 2027 tungod sa padayong pagtubo sa sektor sa manukan, diin gibanabanang mosaka og hapit unom ka porsyento ang produksiyon sa karne sa manok sa 2027.
Ang Pilipinas nagpabiling nag-unang merkado sa eksport sa ‘soybean meal’ sa Estados Unidos.
Gibutyag usab sa USDA nga milabaw og 118,000 ka tonelada ang wala pa makompletong halin sa unang semana kon itandi sa kasagarang rekord sa miaging lima ka tuig.
Ang ‘soybean meal’ kasagarang sagol sa pagkaon sa mga hayop sama sa baboy ug manok, ingon man sa mga hayop nga gibuhi sa industriya sa akwakultura.
Sukad sa marketing year 2021 hangtod 2022, padayong misaka ang produksiyon ug eksport sa ‘soybean meal’ sa Estados Unidos.
Matod sa USDA, ang mas kompetitibong presyo sa ‘soybean meal’ ug ang nagkadakong panginahanglan sa tibuok kalibotan maoy nagdasig sa pagsaka sa eksport sa Estados Unidos, nga gilauman pang motaas og 11 percent sa marketing year 2026 hangtod 2027.
Gawas sa Pilipinas, lakip usab sa mga nag-unang merkado sa eksport sa ‘soybean meal’ sa Estados Unidos ang Mexico, Canada, Colombia ug Vietnam.
