Nagpakita og bayanihan ang mga personahe sa Department of Public Works and Highways (DPWH), Philippine National Police (PNP), Armed Forces of the Philippines (AFP), Philippine Coast Guard, ug mga opisyal sa Barangay Labangal alang sa dinaliang paghuman sa sandbagging activity sa Makar Bridge 1 sa General Santos City.
Gipunting sa maong kalihokan ang tuong bahin sa upstream revetment sa tulay diin gipakusgan ang pagbutang og sandbags aron mapalig-on ang dike ug malikayan ang dugang nga kadaot sa lugar.
Nadaot ang maong bahin sa imprastraktura human kini maanod sa kusog nga bul-og sa tubig-baha nga resulta sa kusog nga ulan, nga naghulga sa mga komunidad ug panginabuhian sa mga residente nga nagpuyo duol sa suba.
Ang maong emergency response kabahin sa pagpatuman sa direktiba ni Presidente Ferdinand Marcos Jr. nga siguruhong mapanalipdan ang mga komunidad ug imprastraktura batok sa epekto sa pagbaha.
Samtang, padayon usab ang 24/7 monitoring ug restoration activities sa DPWH XII Quick Response Team aron matubag dayon ang mga kadaot ug malikayan ang mas dakong epekto sa padayon nga pag-ulan ug hulga sa baha sa nagkadaiyang lugar.
