Gipapalayas sa Philippine Coast Guard ang mga langyaw nga barkong pangisda nga nakita sa teritoryo sa Kota Island sa West Philippine Sea kagahapon Domingo.
Matod pa sa tigpamaba nga si Jay Tarriela, kini ang ilang ikaupat nga operasyon sulod sa tulo ka semana.
Sumala sa PCG, nagpatrolya sila gamit ang High-Speed Response Boat sa gilay-on nga 1.75 nautical miles amihanan ug amihanan-kasadpan sulod sa 12 nautical miles gikan sa teritoryo sa Pilipinas sa dihang nakakita sila og langyaw nga barko.
Migamit ang PCG og mga rubber boat aron moduol sa langyaw nga barko samtang balik-balik nga gitambagan kini nga mobiya sa lugar.
Kini pipila lang sa mga higayon nga gipalayas sa PCG ang daghang mga langyaw sa palibot sa teritoryo sa Pilipinas.
Apil niini ang pagsalikway sa mga barko sa China ug upat pa ka gagmay nga mga sakayan sa Lawak Island niadtong Oktubre 15.
Sumala sa PCG, gidili ang mga langyaw sa pagpangisda sa teritoryo sa Pilipinas nga walay pagtugot, ubos sa Philippine Fisheries Code ug sa Philippine Maritime Zones Act.
Matod ni PCG Commandant Adm. Ronnie Gil Gavan, magpadayon sila sa pagpatrolya sa Kalayaan Island Group uban sa pakigtambayayong sa Philippine Marine Corps.
