GENSAN- Gipahibalo sa South Cotabato Electric Cooperative Incorporated kon SOCOTECO II ang opisyal nga resulta sa plebisito alang sa gisugyot nga Conditional Joint Venture Agreement o CJVA tali sa kooperatiba ug Ignite Power and Energy Holdings Incorporated.
Base sa sertipiko nga gipagawas sa Overall Plebiscite Committee kagahapon, Oktubre 18, mikabat sa 137,978 ka miyembro ang mibotar og ‘YES’, samtang 4,811 ang mibotar og ‘NO’, gikan sa kinatibuk-ang 142,789 ka balidong boto.
Ang mga boto natigom gikan sa upat ka hugna sa plebisito nga gipahigayon niadtong Setyembre 19 hangtod 20, Setyembre 26 hangtod 27, Oktubre 10 hangtod 11, ug Oktubre 17 hangtod 18 ning tuiga.
Subay sa sertipiko, ang mga mibotar og YES nagrepresentar sa 60.91% sa kinatibuk-ang 226,534 ka kwalipikadong botante base sa rekord sa miyembro sa SOCOTECO II.
Gideklara sa kooperatiba nga pinal ug opisyal na ang resulta sa plebisito human makompleto ang pag-ihap ug pag-‘consolidate’ sa mga boto gikan sa nagkalain-laing distrito.
