Giduso karon sa Office of the Building Official (OBO) ang mga tag-iya sa mga establisemento nga adunay nadaot o nagubang mga building nga magkuha og demolition permit aron mapanalipdan ang kaluwasan sa publiko.
Matud ni OBO representative Aurea Pascual, dili angay gamiton o pasudlon ang mga tawo sa mga estrukturang adunay grabeng kadaot tungod sa risgo sa pagkahugno ug posibleng disgrasya.
Gipasabot niya nga ang pagkuha og demolition permit makatabang aron masiguro nga hapsay ug luwas ang pagtangtang sa mga delikadong bahin sa building, ilabina sa mga estrukturang naapektuhan sa kalamidad o grabeng kadaot.
Samtang, gipahinumdoman usab ni Pascual ang mga building owners nga makigtambayayong sa OBO ug motuman sa mga regulasyon aron malikayan ang peligro sa kinabuhi ug kabtangan.
Dugang pa sa opisyal, nagsugod na usab ang annual inspection sa mga building sa syudad isip kabahin sa padayon nga pagpalig-on sa kaluwasan sa mga establisemento.
