Gimando ni Department of National Defense Secretary Gilberto C. Teodoro Jr. ang pagpalapad pa sa sakop sa Direct Commission Program aron makadani og mas daghang kuwalipikadong Filipino professionals nga mahimong kabahin sa Armed Forces of the Philippines. Kini kabahin sa tinguha sa militar nga makapalambo og mas flexible, technologically capable, ug multi-disciplinary nga pwersa militar.
Subay sa direktiba sa kalihim ngadto sa AFP, gipalig-on ang recruitment ug commissioning sa mga kuwalipikadong nagtapos sa Advance Reserve Officers’ Training Corps.
Matod ni Teodoro, kinahanglan nga ablihan sa AFP ang mas daghang oportunidad alang sa mga takos nga enlisted personnel ug mga propesyonal nga adunay espesyal nga kahibalo sa cyber operations, artificial intelligence, engineering, aviation, communications, ug uban pang teknikal nga natad.
Apil usab sa target sa programa ang mga Filipino professionals nga adunay lawom nga kahibalo ug pagbansay sa research and development ug uban pang teknolohiya nga makatampo sa modernisasyon ug pagpalig-on sa Sandatahang Lakas sa Pilipinas.
Gimandoan usab sa DND chief ang AFP sa paghimo og merit-based system alang sa commissioning sa mga enlisted personnel, ug sa paghatag og makatarunganong konsiderasyon sa mga persons with disabilities nga adunay espesyal nga kahanas nga makatabang sa pagpalambo sa defense sector.
Gipasiugda ni Sec. Teodoro nga importante ang pag-andam og angay nga training ug career development programs alang sa mga personnel nga marecruit pinaagi sa maong programa aron mas mapalig-on ang kapasidad sa militar.
Gipahinumdoman usab niya nga ang implementing guidelines sa expanded Direct Commission Program kinahanglan magpabiling subay sa mga balaod nga naggiya sa modernisasyon sa AFP.
Ang Expanded Direct Commission Program usa sa mga lakang sa pagsuporta sa modernization efforts sa AFP ubos sa Comprehensive Archipelagic Defense Concept. Pinaagi sa pagpalig-on sa human capital o manpower, naglaum ang DND nga mas mapauswag pa ang abilidad sa Sandatahang Lakas sa Pilipinas sa pagpanalipod sa nasud batok sa nagkalain-laing mga hulga.
