Nagpadayon ang pagpahimangno sa Office of Civil Defense Region 12 o OCD-12 ngadto sa publiko nga magpabiling alerto ug unahon ang kaluwasan samtang nagpadayon ang epekto sa kusog nga pag-ulan ug pagbaha sa pipila ka lugar sa rehiyon.
Matud ni Beverly Anne Santos, Information Officer sa OCD Region 12, mas maayo nga mopadulong ang mga residente ngadto sa mas habog o luwas nga lugar ilabina kon adunay ipagawas nga preventive evacuation order gikan sa ilang lokal nga panggamhanan.
Gihangyo niya ang publiko nga sundon dayon ang mga pahimangno sa mga otoridad aron malikayan ang posibleng peligro sa kinabuhi.
Samtang suspendido pa ang klase ug trabaho sa pipila ka lugar, girekomendar sa OCD-12 nga magpabilin na lamang sa ilang mga panimalay ang mga residente kung luwas kini, ug likayan ang dili gikinahanglang paggawas.
Gipahimangnoan usab ni Santos ang publiko nga ayaw himoang kalingawan ang pagtabok sa baha tungod kay delikado kini ug mahimong mosangpot sa aksidente o pagkawala sa kinabuhi. Iyang gipasiugda nga kinahanglan ang pag-amping ug kooperasyon sa tanan aron malikayan ang epekto sa kalamidad.
