Nagpadayon ang lokal nga panggamhanan sa General Santos City sa pag-awhag sa mga fish vendors nga nagpabilin gihapon sa Fish Section sa Phase A sa Gensan City Public Market nga mobalhin na sa temporaryong pwesto nga gitagana sa syudad sa parking area sa merkado.
Sumala kang City Administrator Shandee Pestaño, gi-deklarar na nga restricted o red-tagged ang Fish Section human kini maapektuhan sa Magnitude 7.8 nga linog niadtong Hunyo 8, busa dili na kini luwas alang sa mga vendors ug mga mamalitay.
Matud pa sa opisyal, adunay na’y ubang fish vendors nga boluntaryong nibalhin sa bag-ong lokasyon. Apan, adunay gihapon pipila nga nagdumili ug nagpabilin sa maong lugar bisan pa sa mga pahimangno sa syudad.
Tungod niini, gipahibalo ni Pestaño nga i-cordon na sa LGU ang Fish Section aron mapugngan ang pagsulod sa mga tawo ug malikayan ang posibleng disgrasya, ilabina kay delikado na ang estruktura base sa resulta sa gihimong assessment human sa linog.
