Nagpadayon karong ikalimang adlaw ang pagpangita sa mga rescuers kang Baby Saviour, ang bata nga hangtod karon wala pa makit-i human matabunan sa landslide nga miigo sa Malapatan, Sarangani Province.
Samtang nagpadayon ang search and retrieval operations, gilubong na kagahapon ang siyam ka mga biktima nga namatay sa maong trahedya. Gitambongan kini sa ilang mga pamilya, paryente, ug mga opisyal sa lokal nga panggamhanan isip pakigduyog sa ilang kasubo.
Bisan pa sa paglabay sa pipila ka adlaw sukad sa insidente, wala gihapon mohunong ang mga otoridad ug mga responder sa pagpangita kang Baby Saviour. Nagpadayon ang ilang paningkamot aron makit-an ang bata ug mahatagan usab sa iyang pamilya og hustong pahulay.
Naghangyo usab ang lokal nga panggamhanan sa publiko nga ipadayon ang pag-ampo alang sa kalampusan sa search operation ug sa tanang pamilya nga naapektuhan sa maong makapasubo nga trahedya.
