Malampusong gibalik sa ilang natural nga pinuy-anan ang tulo ka Philippine Tarsier sa Department of Environment and Natural Resources – Provincial Environment and Natural Resources Office (DENR-PENRO) Sarangani niadtong Hulyo 14 human kini giluwas sa magtiayong Jackyben ug Elizabeth Mangalon sa daplin sa suba sa Alabel atol sa kusog nga pagbaha.
Sumala sa DENR-PENRO Sarangani, nakit-an sa magtiayon ang mga tarsier nga posibleng naapektuhan sa kusog nga agos sa tubig tungod sa pagbaha. Tungod sa ilang kahibalo sa kahinungdanon sa pagpanalipod sa wildlife, ilang giluwas ug gitugyan kini ngadto sa mga awtoridad aron masusi ug maatiman.
Gisusi sa mga wildlife specialist ug beterinaryo sa DENR ang kahimtang sa tulo ka tarsier ug napamatud-ang maayo ang ilang kondisyon. Human mapamatud-ang himsog ug andam na sila mobalik sa ilang palibot, gipagawas kini pag-usab sa luwas nga lasang nga nagsilbing ilang natural nga puy-anan.
Gipasalamatan sa DENR ang magtiayong Mangalon tungod sa ilang responsableng aksyon ug pagtabang sa pagpanalipod sa usa sa mga pinakatalagsaong hayop nga makita lamang sa Pilipinas.
Gipahinumdoman usab sa ahensya ang publiko nga ang Philippine Tarsier usa ka Near Threatened species ug adunay dakong papel sa balanse sa ekosistema. Gidili ang pagdakop, pagpanag-iya, pagbaligya, o pagbalhin niini nga walay tukmang permiso gikan sa gobyerno subay sa Republic Act No. 9147 o Wildlife Resources Conservation and Protection Act.
