Duha ka tawo ang nagpabiling missing human sa kalit nga pagbaha o flash flood nga miigo sa pipila ka lugar, diin giingong usa sa posibleng hinungdan ang artificial damming o pagbabag sa natural nga agianan sa tubig.
Matud ni Glan Mayor Victor James “Tata” Yap, padayon ang pagpangita sa mga otoridad sa duha ka missing nga indibidwal samtang nagpadayon usab ang assessment sa epekto sa maong insidente.
Sumala sa mayor, gisusi pa sa mga eksperto ug hingtungdan nga ahensya ang eksaktong hinungdan sa kalit nga pagsaka sa tubig, lakip na ang posibleng epekto sa mga bara o naipon nga materyales nga nakapugong sa normal nga pag-agos sa tubig.
Gipahayag usab ni Mayor Yap nga padayon ang koordinasyon sa lokal nga panggamhanan uban sa mga responder aron matabangan ang mga apektadong residente ug mapalawig ang mga lakang alang sa kaluwasan sa komunidad.
Gihangyo usab ang mga residente nga magpabiling alerto ug mosunod sa mga pahimangno sa awtoridad ilabi na panahon sa kusog nga pag-ulan aron malikayan ang dugang peligro.
