Nasinatian sa mga residente sa Purok 9A, Barangay Poblacion sa Malapatan, Sarangani Province ang dakong pagbaha kagabii tungod sa walay hunong nga pag-ulan nga dala sa Southwest Monsoon o Habagat.
Misulod ang baha sa pipila ka mga panimalay ug nakapalisod sa paglihok sa mga residente. Sa pagkakaron, padayon ang pagmonitor sa mga lokal nga otoridad aron masiguro ang kaluwasan sa mga apektadong pamilya ug mahatagan dayon sila og tabang kon gikinahanglan.
Samtang nagpadayon ang pag-ulan sa nagkalain-laing bahin sa SOCCSKSARGEN, nagpadayon ang pahimangno ang Office of Civil Defense o OCD Region 12.
Sumala ni Beverly Ann Santos, Information Officer sa OCD Region 12, kinahanglan nga magmatngon ang publiko batok sa posibleng pagbaha, landslide ug uban pang peligro nga mahimong idulot sa padayon nga kusog nga pag-ulan.
Gihangyo sa OCD ang mga residente nga nagpuyo duol sa mga suba, sapa, kabukiran ug ubos nga mga lugar nga magpadayon sa pagmonitor sa mga advisory gikan sa PAGASA ug sa ilang lokal nga disaster risk reduction offices. Gidasig usab ang matag panimalay nga mag-andam og emergency go bag ug mosunod dayon sa evacuation kon adunay ipagawas nga mando ang mga otoridad.
