Nasunog ang usa ka classroom sa Maasim Central Elementary School sa Barangay Poblacion, Maasim, Sarangani Province alas-1:00 sa kaadlawon karong adlawa, Hulyo 10.
Sa inisyal nga report, wala pa mahibaloi ang hinungdan sa sunog ug padayon pa ang imbestigasyon sa Bureau of Fire Protection o BFP aron matino ang gigikanan niini. Dali usab nga mitubag ang mga bombero uban sa tabang sa mga residente aron mapalong ug mapugngan ang pagdako sa kalayo.
Samtang nagpadayon ang operasyon sa mga otoridad, ang aso gikan sa sunog gipalid sa kusog sa hangin paingon sa kasikbit nga mga bahin sa Barangay Poblacion. Tungod niini, gipahimangnoan ang mga residente nga likayan ang maong lugar ug magsunod sa mga tambag sa BFP ug lokal nga panggamhanan aron malikayan ang posibleng peligro sa ilang panglawas ug kaluwasan.
Sa pagkakaron, wala pa’y gitaho nga adunay naangol o namatay sa maong insidente, ug padayon ang imbestigasyon sa Bureau of Fire Protection aron mahibaluan ang tinuod nga hinungdan sa sunog.
