Nasinatian sa daghang mga nasud sa Europa ang grabeng heat wave sa miaging semana diin misaka pag-ayo ang temperatura ug nakahatag og dakong kalisod sa mga residente.
Sa pakighinabi sa Bombo Radyo Gensan, gibutyag ni Queenie Signar, Bombo International Correspondent sa France, nga daghang mga tawo ang lisod kaayo sa pag-agwanta sa maong kainit ilabina kay dili anad ang kadaghanan sa ingon ka taas nga temperatura.
Matud pa niya, halos tanan nga mga establisemento sa France walay air conditioning o cooling system tungod kay ang ilang mga bilding ug imprastraktura gidisenyo alang sa bugnaw nga klima ug dili sa taas nga kainit.
Dugang pa ni Signar nga bisan nailhan ang Pilipinas nga init nga nasud, lahi ang klase sa kainit nga ilang nasinatian sa Europa, nga mas bug-at ug lisod antuson alang sa mga residente nga naanad sa tugnaw nga panahon.
Padayon usab ang pagpasidaan sa mga awtoridad sa publiko nga maglikay sa taas nga pagpabilin ilawom sa adlaw, mag-inom og igo nga tubig, ug magbantay batok sa posibleng epekto sa grabeng kainit sama sa heat exhaustion ug heat stroke.
