Gisugdan na sa Lokal nga Panggamhanan sa Heneral Santos ang ikaduhang hugna o second wave sa house-to-house distribution sa Family Food Packs alang sa mga pamilyang naapektuhan ug nanginahanglan og tabang.
Ang maong distribusyon pagapangunahan sa mga opisyal sa matag barangay uban sa tabang sa Local Government Unit (LGU) aron masiguro nga hapsay, organisado, ug makaabot sa matag benepisyaryong pamilya ang mga ayuda.
Gipahinumdoman sa city government nga ang matag barangay ang magtakda sa iskedyul sa pagpanghatag sulod sa ilang nasakupan. Busa, giawhag ang mga residente nga makigkoordinar sa ilang mga opisyal sa barangay aron mahibal-an ang tukmang petsa ug oras sa distribusyon.
Sumala sa lokal nga panggamhanan, padayon ang ilang paningkamot aron masiguro nga walay pamilyang mabiyaan ug ang tanang kwalipikadong benepisyaryo makadawat sa angay nga suporta samtang nagpadayon ang pagbangon sa syudad.
