Giila sa City Population Office nga usa sa labing komon ug seryosong problema nga giatubang sa katilingban karon mao ang bullying.
Matud ni Judith Janiola, City Population Officer, kasagaran magsugod ang bullying sulod mismo sa pamilya ug mahimong madala hangtod sa komunidad ug uban pang lugar diin nagpakig-uban ang mga tawo.
Gipasabot niya nga ang maong problema dili lamang makita sa mga eskwelahan kondili usab sa mga trabahoan ug bisan asa nga palibot diin adunay interaksyon tali sa mga indibidwal.
Sumala kang Janiola, importante nga hatagan ug dakong pagtagad ang bullying tungod sa negatibong epekto niini sa emosyonal, mental ug sosyal nga kahimtang sa usa ka tawo, ilabina sa mga kabatan-onan.
Tungod niini, nanawagan siya sa mga ginikanan, magtutudlo ug mga lider sa komunidad nga magtinabangay sa pagpugong ug pagsulbad sa maong suliran pinaagi sa husto nga paggiya, edukasyon ug pagpalig-on sa respeto ug pagsinabtanay sa matag panimalay ug komunidad.
Gidugang niya nga pinaagi sa hiniusang paningkamot sa tanang sektor, mahimong maminusan ang mga kaso sa bullying ug mamugna ang mas luwas ug mas maayong palibot alang sa tanan.
