Nagtuo si retired Judge Lorenzo Balo, usa sa mga political analyst sa dakbayan sa General Santos, nga ang desisyon ni Senador Alan Peter Cayetano sa pagbiya sa iyang puwesto isip Senate President nagpakita sa iyang kaisog ug dakong pagtagad sa integridad sa institusyon.
Matud pa ni Balo, nalipay siya sa maong lakang tungod kay kini maghatag og higayon aron mabalik sa normal ug hapsay nga dagan ang trabaho sa Senado human sa pipila ka adlaw nga naapektuhan sa kagubot nga may kalabotan sa liderato sa taas nga kapulungan.
Dugang niya, pinaagi sa gipahigayon nga special session ug sa paglingkod sa bag-ong liderato, gilauman nga mapadayon na pag-usab ang mga buluhaton sa Senado ug ang paghisgot sa mga importanteng mga panukalang balaod ug mga isyu nga makaapekto sa nasud.
Gipasiugda usab ni Balo nga usa sa unang mihimo og lakang si Senador Joel Villanueva pinaagi sa pagpasa og resolusyon nga may kalabotan sa kahimtang sa mga residente sa Mindanao nga naapektuhan sa kusog nga linog.
Samtang nagpadayon ang mga hagit nga giatubang sa nasud, gilauman nga ang Senado magpabiling aktibo sa paghatag og mga lakang ug suporta alang sa mga komunidad nga nanginahanglan og tabang, ilabina sa mga lugar nga grabeng naapektuhan sa kalamidad.
