GENSAN- Miabot na sa siyam ka tawo ang natalang namatay sa General Santos City human kini gitay-og sa Magnitude 7.8 nga linog pasado alas-7:00 sa buntag.
Sumala sa City Disaster Risk Reduction and Management Office (CDRRMO) sa Gensan, nagpadayon pa gihapon ang search and rescue operations alang sa tulo pa ka indibidwal nga wala pa makita.
Samtang, miabot usab sa 142 ang gidaghanon sa mga nasamdan tungod sa kusog nga pag-uyog.
Lakip niini ang lima ka indibidwal gikan sa Brgy. Calumpang, 15 sa Brgy. Tambler, 18 sa Brgy. Lagao, upat sa Brgy. Tinagacan, 18 sa Brgy. Apopong, 25 sa Brgy. Baluan, 10 sa Brgy. Fatima, 40 sa Brgy. San Isidro, upat sa Brgy. Labangal, ug duha sa Brgy. West.
Daghang mga establisemento usab, lakip na ang pipila ka mga mall ug eskwelahan sa General Santos City ug Sarangani, ang nadaot o hingpit nga naguba tungod sa kusog nga linog.
Aduna usab report nga duha na ka tawo ang namatay sa lalawigan sa Sarangani.
Tungod niini, gisuspinde sa lokal nga kagamhanan ang mga klase ug trabaho, lakip na ang operasyon sa pipila ka pribadong kompanya, isip pag-amping ug aron masiguro ang kaluwasan sa publiko.
