Giawhag ni Senate President Win Gatchalian ang Department of Education o DepEd nga siguruhong dili mosamot ang ‘learning loss’ o pagkunhod sa kahibalo sa mga estudyante tungod sa mga lakang batok sa hulga sa El Niño.
Matod ni Gatchalian, kinahanglan ipahiangay sa aktuwal nga kahimtang sa matag lugar ang pagsuspinde sa klase imbes nga magpatuman og halapad nga pagkansela niini aron mapanalipdan ang mga estudyante nga dili maapektuhan ang ilang pagtuon.
Gipasiugda sa Senate President nga dili lamang kaluwasan sa mga estudyante ang nameligro tungod sa El Niño, kondili apil usab ang ilang abilidad sa pagkat-on.
Busa, kinahanglan siguruhon nga dili moubos ang ilang nakuhang kahibalo kay makapasamot kini sa krisis sa edukasyon.
Gikutlo sa senador ang ‘policy note’ sa ‘Second Congressional Commission on Education’ nga nagpakita nga nawad-an og bugti sa 20 ka adlaw nga pagtudlo ang usa ka kasagarang pampublikong elementarya atol sa School Year 2025-2026 tungod sa pagsuspinde sa klase nga gipahinabo sa mga peligro ug kalamidad.
Nakaplagan usab sa maong report nga sa matag usa ka adlaw nga suspendido ang klase, bugti kini sa pagkawala sa gibana-banang 1.4 ka adlaw nga progreso sa kahanas sa pagbasa sa mga estudyante.
Tungod niini, giingon ni Gatchalian nga kinahanglan balansehon sa DepEd ang kaluwasan sa mga estudyante ug ang pagpadayon sa ilang pagkat-on taliwala sa grabeng kainit nga dala sa El Niño.
