SARANGANI- Gikataho ni Joey Babayen-on, RN, ang HIV Treatment Nurse Coordinator sa Red Ribbon Hub sa Sarangani Provincial Hospital, nga nakapagtala og 277 ka bag-ong kaso sa HIV ug AIDS ang rehiyon sa SOCCSKSARGEN gikan niadtong Enero hangtod Marso 2026.
Sumala sa maong taho, ang nag-unang apektado sa maong virus mao kadtong nag-edad og 25 hangtod 34 anyos, ug gisundan kini sa grupo sa mga batan-on nga nag-edad og 15 hangtod 24 anyos.
Giila nga lakip sa mga dapit nga nakasinati niini nga pagsaka sa kaso mao ang Sarangani, GenSan, South Cotabato, Cotabato, ug uban pang mga duol nga probinsya.
Gipasiugda sa opisyal nga ang HIV dili lang usa ka isyu sa panglawas kondili usa na usab ka isyu sa katilingban, hinungdan nga giatiman usab nila ang mental health sa mga pasyente nga sagad makasinati og depresyon ug grabeng kabalaka sulod sa unang unom ka bulan sa pagtambal.
Tungod niini, holistic o tibuok ang pamaagi sa ilang pag-atiman pinaagi sa paghatag og saktong pagtagad sa pisikal ug emosyonal nga kahimtang sa mga natakdan. Sa katapusan, giawhag niya ang publiko nga magpapreserba sa ilang kompidensyal nga pagpa-test sa Red Ribbon Hub aron masubay ug matambalan dayon ang virus alang sa mas taas nga kinabuhi.
