GENSAN- Nagpahayag ang lokal nga panggamhanan sa Dakbayan sa Gensan og kabalaka tungod sa padayon nga pagsaka sa kaso sa HIV sa siyudad.
Gipahibalo usab ni Dr. Karl Igrobay, Assistant Department Head sa City Health Office sa Gensan, nga sumala sa datos sa Department of Health o DOH, namatikdan nga ang Gensan adunay labing taas nga kaso sa HIV sa tibuok SOCCSKSARGEN Region.
Tungod niini, mas gipakusgan karon sa lokal nga gobyerno ang mga awareness campaign kabahin sa HIV ug uban pang sexually transmitted diseases o STDs.
Padayon usab nga ginabantayan sa mga health workers ang implementasyon sa mga programa batok sa HIV aron malikayan ang dugang pagsaka sa kaso.
Giduso usab sa mga otoridad ang mas aktibong edukasyon ug paghatag og impormasyon ngadto sa publiko aron mapalapdan ang kahibalo sa komunidad kabahin sa maong sakit.
Gihangyo usab sa mga opisyal ang kooperasyon sa katawhan aron mahimong epektibo ang kampanya batok sa HIV sa siyudad.
