GENSAN- Gipahayag ni Atty. Rogelio Garcia nga dako ang posibilidad nga maabswelto si Vice President Sara Duterte sa iyang giatubang nga mga kaso tungod sa kalisod sa pagkuha og 16 ka boto sa Senado alang sa iyang kombiksyon, butang nga maghatag kaniya og dakong higayon nga makapadayon sa iyang kandidatura pagka-Presidente sa 2028.
Gipunting ni Atty. Garcia nga sa pag-abot sa tuig 2027, mas makita na ang kausaban sa politikanhong dagan ilabi na sa pagpasaka sa Certificate of Candidacy (COC) sa Oktubre 2027, diin iyang gipasiugdahan nga sa pagkakaron wala pa’y lig-on nga kaatbang nga mokontra sa bise presidente.
Tungod niini, nagtuo siya nga mapugos ang kasamtangang administrasyon sa pagpakig-alyansa sa uban pang mga grupo o partido aron lang mapugngan ang nagkakusog nga puwersa ni Duterte sa umaabot nga piniliay.
